ತಲಕಾಡಿನ ಕಾವೇರಿ ಮಡಿಲಲ್ಲಿ ಪ್ರವಾಸಿ ವಿದ್ಯಾರ್ಥಿಗಳ ಜಲಸಮಾಧಿ: ಶಾಲಾ ಪ್ರವಾಸದಲ್ಲಿ ಸಂಭವಿಸಿದ ಘೋರ ದುರಂತಕ್ಕೆ ಇಬ್ಬರು ಬಲಿ

ಸಂತಸದ ಪ್ರವಾಸದಲ್ಲಿ ಸೂತಕದ ಛಾಯೆ: ನಿಸರ್ಗಧಾಮದಲ್ಲಿ ಈಜಲು ಹೋದ ಬೆಂಗಳೂರಿನ ಹದಿನಾರರ ಹರೆಯದ ಇಬ್ಬರು ವಿದ್ಯಾರ್ಥಿನಿಯರು ನೀರುಪಾಲು, ಮತ್ತೋರ್ವ ಸ್ಥಿತಿ ಗಂಭೀರ

ಮೈಸೂರು: ಪ್ರಕೃತಿಯ ಸೊಬಗನ್ನು ಸವಿಯಲು ಶಾಲೆಯಿಂದ ಉತ್ಸಾಹದಿಂದ ಬಂದಿದ್ದ ವಿದ್ಯಾರ್ಥಿಗಳ ಪಾಲಿಗೆ ವಿಧಿಯು ಜಲರೂಪದಲ್ಲಿ ಮೃತ್ಯುವಾಗಿ ಎರಗಿದೆ. ಐತಿಹಾಸಿಕ ತಲಕಾಡಿನ ನಿಸರ್ಗಧಾಮದ ಕಾವೇರಿ ನದಿ ತೀರಕ್ಕೆ ಪ್ರವಾಸಕ್ಕೆ ಬಂದಿದ್ದ ಬೆಂಗಳೂರಿನ ಶಾಲಾ ತಂಡದ ಇಬ್ಬರು ವಿದ್ಯಾರ್ಥಿನಿಯರು ನೀರಿನಲ್ಲಿ ಮುಳುಗಿ ದಾರುಣವಾಗಿ ಸಾವನ್ನಪ್ಪಿದ್ದು, ಇಡೀ ಪ್ರವಾಸಿ ತಂಡವೇ ಮೌನಕ್ಕೆ ಶರಣಾಗಿದೆ. ಬೆಂಗಳೂರಿನಿಂದ ಪ್ರವಾಸಕ್ಕೆ ಬಂದಿದ್ದ ಚಾರ್ವಿ (15) ಹಾಗೂ ರಮ್ಯ (16) ಮೃತಪಟ್ಟ ದುರ್ದೈವಿಗಳು.

​ಬೆಂಗಳೂರಿನ ಶಾಲೆಯೊಂದರಿಂದ ಒಟ್ಟು 72 ವಿದ್ಯಾರ್ಥಿಗಳ ತಂಡ ಶೈಕ್ಷಣಿಕ ಪ್ರವಾಸಕ್ಕಾಗಿ ತಲಕಾಡಿಗೆ ಆಗಮಿಸಿತ್ತು. ನಿಸರ್ಗಧಾಮದ ಬಳಿ ಕಾವೇರಿ ನದಿಯ ಸೌಂದರ್ಯಕ್ಕೆ ಮನಸೋತ ವಿದ್ಯಾರ್ಥಿಗಳು ನೀರಿನಲ್ಲಿ ಆಟವಾಡಲು ಇಳಿದಿದ್ದಾರೆ. ಈ ವೇಳೆ ನೀರಿನ ಆಳ ತಿಳಿಯದೆ ವಿದ್ಯಾರ್ಥಿನಿಯರು ಆಯತಪ್ಪಿ ಸೆಳೆತಕ್ಕೆ ಸಿಲುಕಿ ಮುಳುಗಿದ್ದಾರೆ. ಇದನ್ನು ಗಮನಿಸಿದ ಕೂಡಲೇ ಸ್ಥಳೀಯರು ಹಾಗೂ ಸಹಪಾಠಿಗಳು ರಕ್ಷಣೆಗೆ ಮುಂದಾದರಾದರೂ, ಚಾರ್ವಿ ಮತ್ತು ರಮ್ಯ ಅಷ್ಟರಲ್ಲೇ ನೀರಿನಲ್ಲಿ ಉಸಿರುಗಟ್ಟಿ ಕೊನೆಯುಸಿರೆಳೆದಿದ್ದರು.

​ಇದೇ ಘಟನೆಯಲ್ಲಿ ಸುಚಿತ್ರ ಎಂಬ ಮತ್ತೊಬ್ಬ ವಿದ್ಯಾರ್ಥಿನಿ ಕೂಡ ಮುಳುಗುತ್ತಿದ್ದು, ಕೂಡಲೇ ಆಕೆಯನ್ನು ರಕ್ಷಿಸಲಾಗಿದೆ. ಸದ್ಯ ಸುಚಿತ್ರ ಅವರ ಸ್ಥಿತಿ ಗಂಭೀರವಾಗಿದ್ದು, ತಕ್ಷಣವೇ ಸ್ಥಳೀಯ ಆಸ್ಪತ್ರೆಗೆ ದಾಖಲಿಸಿ ತುರ್ತು ಚಿಕಿತ್ಸೆ ನೀಡಲಾಗುತ್ತಿದೆ. ಗೆಳೆಯರೊಂದಿಗೆ ನಗುನಗುತ್ತಾ ಕಾಲ ಕಳೆಯಬೇಕಿದ್ದ ಇಬ್ಬರು ಬಾಲಕಿಯರು ಹೀಗೆ ಅಕಾಲಿಕವಾಗಿ ನೀರುಪಾಲಾದುದು ನೋಡುಗರ ಕಣ್ಣನ್ನು ತೇವಗೊಳಿಸಿತು. ಘಟನಾ ಸ್ಥಳದಲ್ಲಿ ಪೋಷಕರ ಆಕ್ರಂದನ ಹಾಗೂ ಸಹಪಾಠಿಗಳ ಆತಂಕ ಮುಗಿಲು ಮುಟ್ಟಿದ್ದು, ಮೃತರ ಶವಗಳನ್ನು ಮರಣೋತ್ತರ ಪರೀಕ್ಷೆಗೆ ರವಾನಿಸಲಾಗಿದೆ. ಪ್ರವಾಸಿ ತಾಣಗಳಲ್ಲಿನ ಸುರಕ್ಷತೆಯ ಬಗ್ಗೆ ಈ ಘಟನೆ ಮತ್ತೊಮ್ಮೆ ಗಂಭೀರ ಪ್ರಶ್ನೆಗಳನ್ನು ಹುಟ್ಟುಹಾಕಿದೆ.