ಹೆಜ್ಜೇನು ದಾಳಿ: ಮರದಲ್ಲೇ ವ್ಯಕ್ತಿ ದುರ್ಮರಣ - ಜೇನು ತೆಗೆಯುವ ಮುನ್ನ ಇರಲಿ ಎಚ್ಚರ!

ಕನಿಷ್ಠ ಸುರಕ್ಷತಾ ಕ್ರಮಗಳಿಲ್ಲದೆ ಜೇನು ತೆಗೆಯಲು ಹೋಗುವುದು ಅಪಾಯಕ್ಕೆ ಆಹ್ವಾನ: ತಜ್ಞರ ಎಚ್ಚರಿಕೆ

ಚಿಕ್ಕಬಳ್ಳಾಪುರ :  ಸರಿಯಾದ ಮುನ್ನೆಚ್ಚರಿಕೆ ಹಾಗೂ ಸುರಕ್ಷತಾ ಕ್ರಮಗಳನ್ನು ಕೈಗೊಳ್ಳದೆ ಹೆಜ್ಜೇನು ತೆಗೆಯಲು ಹೋದ ವ್ಯಕ್ತಿಯೊಬ್ಬರು ಜೇನು ನೊಣಗಳ ದಾಳಿಗೆ ತುತ್ತಾಗಿ ಮರದ ಮೇಲೆಯೇ ಪ್ರಾಣಬಿಟ್ಟಿರುವ ಘೋರ ಘಟನೆ ಚಿಕ್ಕಬಳ್ಳಾಪುರ ಜಿಲ್ಲೆಯ ಮಂಚೇನಹಳ್ಳಿ ಪೊಲೀಸ್ ಠಾಣೆ ವ್ಯಾಪ್ತಿಯಲ್ಲಿ ನಡೆದಿದೆ.

​ಘಟನೆಯ ವಿವರ:

ಮಂಚೇನಹಳ್ಳಿ ತಾಲೂಕಿನ ಕಂಬತ್ತನಹಳ್ಳಿ ಗ್ರಾಮದ ನಿವಾಸಿ ಸನಾವುಲ್ಲಾ (48) ಮೃತಪಟ್ಟ ದುರ್ದೈವಿ. ಮಂಚೇನಹಳ್ಳಿ ಹೊರವಲಯದ ನಿರ್ಜನ ಪ್ರದೇಶದಲ್ಲಿದ್ದ ಬೃಹತ್ ಹುಣಸೇ ಮರದಲ್ಲಿ ಕಟ್ಟಿದ್ದ ಹೆಜ್ಜೇನು ಗೂಡನ್ನು ತೆಗೆಯಲು ಸನಾವುಲ್ಲಾ ಮುಂದಾಗಿದ್ದರು. ಜೇನು ಹುಳುಗಳು ಕಚ್ಚದಂತೆ ಔಷಧ ಸಿಂಪಡಣೆ ಮಾಡುತ್ತಿದ್ದ ಸಂದರ್ಭದಲ್ಲಿ, ಏಕಾಏಕಿ ಸಾವಿರಾರು ಜೇನು ನೊಣಗಳು ಅವರ ಮೇಲೆ ದಾಳಿ ಮಾಡಿವೆ.

​ಯಾವುದೇ ರಕ್ಷಣಾ ಕವಚಗಳಿಲ್ಲದೆ ಮರವೇರಿದ್ದ ಸನಾವುಲ್ಲಾ ಅವರಿಗೆ ಜೇನು ನೊಣಗಳ ದಾಳಿಯಿಂದ ತಪ್ಪಿಸಿಕೊಳ್ಳಲು ಸಾಧ್ಯವಾಗದೆ, ಮರದ ಮೇಲೆಯೇ ಪ್ರಾಣ ಬಿಟ್ಟಿದ್ದಾರೆ.

​ಹುಡುಕಾಟದ ವೇಳೆ ಪತ್ತೆಯಾದ ಶವ:

ಕೆಲಸಕ್ಕೆ ಹೋದ ಪತಿ ರಾತ್ರಿಯಾದರೂ ಮನೆಗೆ ಬಾರದ್ದನ್ನು ಕಂಡು ಆತಂಕಕ್ಕೊಳಗಾದ ಪತ್ನಿ, ಎಲ್ಲೆಡೆ ಹುಡುಕಾಟ ನಡೆಸಿದ್ದಾರೆ. ಪತಿ ಪತ್ತೆಯಾಗದಿದ್ದಾಗ ಪೊಲೀಸರಿಗೆ ಮಾಹಿತಿ ನೀಡಿದ್ದಾರೆ. ಪೊಲೀಸರು ಮತ್ತು ಸ್ಥಳೀಯರು ಹುಡುಕಾಟ ನಡೆಸಿದಾಗ, ಮಂಚೇನಹಳ್ಳಿ ಹೊರವಲಯದ ಹುಣಸೇ ಮರದ ಮೇಲೆ ಸನಾವುಲ್ಲಾ ಅವರ ಶವ ನೇತಾಡುತ್ತಿರುವುದು ಪತ್ತೆಯಾಗಿದೆ.

​ಹರಸಾಹಸ ಪಟ್ಟ ಅಗ್ನಿಶಾಮಕ ದಳ:

ಮರದ ಮೇಲೆ ಇನ್ನೂ ಜೇನು ನೊಣಗಳು ಸುತ್ತುವರಿಯುತ್ತಿದ್ದ ಕಾರಣ, ಶವವನ್ನು ಕೆಳಗೆ ಇಳಿಸುವುದು ಪೊಲೀಸರಿಗೆ ಸವಾಲಾಗಿ ಪರಿಣಮಿಸಿತ್ತು. ಸುಮಾರು ಹಲವು ಗಂಟೆಗಳ ಕಾಲ ಕಾರ್ಯಾಚರಣೆ ನಡೆಸಿದ ಪೊಲೀಸರು, ಅಂತಿಮವಾಗಿ ಅಗ್ನಿಶಾಮಕ ದಳದ ಸಿಬ್ಬಂದಿಯ ನೆರವಿನೊಂದಿಗೆ ಶವವನ್ನು ಕೆಳಕ್ಕೆ ಇಳಿಸುವಲ್ಲಿ ಯಶಸ್ವಿಯಾದರು. ಈ ಕುರಿತು ಮಂಚೇನಹಳ್ಳಿ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.

​ಸಾರ್ವಜನಿಕರಿಗೆ ಮನವಿ:

ಹೆಜ್ಜೇನು ಅತ್ಯಂತ ಅಪಾಯಕಾರಿಯಾಗಿದ್ದು, ಅನುಭವವಿಲ್ಲದವರು ಅಥವಾ ಸುರಕ್ಷತಾ ಸಾಧನಗಳಿಲ್ಲದವರು ಜೇನು ತೆಗೆಯುವ ಸಾಹಸಕ್ಕೆ ಕೈ ಹಾಕಬಾರದು. ಜೇನು ನೊಣಗಳ ದಾಳಿಯಾದಾಗ ದೇಹದ ಉಷ್ಣಾಂಶ ಹೆಚ್ಚಾಗಿ ಉಸಿರುಗಟ್ಟುವಿಕೆ ಅಥವಾ ಹೃದಯಾಘಾತ ಸಂಭವಿಸುವ ಸಾಧ್ಯತೆ ಇರುತ್ತದೆ ಎಂದು ತಜ್ಞರು ಎಚ್ಚರಿಸಿದ್ದಾರೆ.