ಕಾಮದ ಅಮಲೇರಿ ತಾಳಿ ಕಟ್ಟಿದ ಗಂಡನನ್ನೇ ಬಲಿಪಡೆದ ಕಿರಾತಕಿ: ಹಬ್ಬಕ್ಕೆ ಹೋದ ಹೆಂಡತಿಯನ್ನು ಕರೆತರಲು ಹೋದವನಿಗೆ ಕಾದಿತ್ತು ಘೋರ ಮೃತ್ಯು!

ಸರಸಕ್ಕೆ ಅಡ್ಡಿಯಾದ ಪತಿಗೆ ಎದೆಯ ಮೇಲೆ ಚಾಕು ಹಾಕಿದ ಪ್ರಿಯಕರ: ಹೆಂಡತಿಯೇ ಸ್ಕೆಚ್ ಹಾಕಿ ಮುಗಿಸಿದ ಗಂಡನ ಹೆಣ ರಸ್ತೆ ಬದಿಯಲ್ಲಿ ಪತ್ತೆ!

ಮೈಸೂರು: ಮದುವೆಯಾಗಿ ಇಬ್ಬರು ಮಕ್ಕಳಿದ್ದರೂ ಪರಪುರುಷನ ಮೋಹಕ್ಕೆ ಬಿದ್ದ ಹೆಣ್ಣೊಬ್ಬಳು, ತನ್ನ ಅಕ್ರಮ ಸುಖಕ್ಕೆ ಅಡ್ಡಿಯಾಗುತ್ತಿದ್ದಾನೆ ಎಂಬ ಒಂದೇ ಕಾರಣಕ್ಕೆ ಕರುಳು ಕಿತ್ತು ಬರುವಂತೆ ಗಂಡನನ್ನೇ ಕೊಲೆ ಮಾಡಿಸಿದ ಘಟನೆ ಇಡೀ ಜಿಲ್ಲೆಯನ್ನು ಬೆಚ್ಚಿಬೀಳಿಸಿದೆ. ಸರಗೂರು ತಾಲೂಕಿನ ಕುರ್ಣೇಗಾಲ ಗ್ರಾಮದ ಜವರಪ್ಪ ಕೊಲೆಯಾದ ದುರ್ದೈವಿಯಾಗಿದ್ದು, ಈತನ ಸಾವಿನ ಹಿಂದೆ ತನ್ನದೇ ಹೆಂಡತಿಯ ಕ್ರೂರ ಹಸ್ತವಿರುವುದು ಈಗ ಬಯಲಾಗಿದೆ. ಪತ್ನಿ ಅಮೃತಾ ಮತ್ತು ಆಕೆಯ ಪ್ರಿಯಕರ ಸಿದ್ದೇಶ ಎಂಬ ಕಾಮಪಿಶಾಚಿಗಳು ಸೇರಿ ಈ ಕೃತ್ಯ ಎಸಗಿದ್ದು, ಈಗ ಪೊಲೀಸರ ಅತಿಥಿಗಳಾಗಿದ್ದಾರೆ.

​ಸರಗೂರು ತಾಲೂಕಿನ ಕುರ್ಣೇಗಾಲ ಗ್ರಾಮದ ಜವರಪ್ಪ, ನಂಜನಗೂಡು ತಾಲೂಕಿನ ಹಾಡ್ಯ ಗ್ರಾಮದ ಅಮೃತಾ ಎಂಬಾಕೆಯನ್ನು ಮದುವೆಯಾಗಿದ್ದರು. ದಂಪತಿಗಳಿಗೆ ಇಬ್ಬರು ಮಕ್ಕಳೂ ಇದ್ದರು. ಆದರೆ, ಈ ನಡುವೆ ಅಮೃತಾಗೆ ಮೈಸೂರಿನ ಮಾವಿನಹಳ್ಳಿ ಗ್ರಾಮದ ಸಿದ್ದೇಶನ ಪರಿಚಯವಾಗಿದೆ. ಈ ಪರಿಚಯ ಅಕ್ರಮ ಸಂಬಂಧಕ್ಕೆ ತಿರುಗಿ, ಇಬ್ಬರೂ ಗಂಡನ ಕಣ್ಣಿಗೆ ಮಣ್ಣೆರಚಿ ಸರಸವಾಡುತ್ತಿದ್ದರು. ಇತ್ತೀಚೆಗೆ ಈ ವಿಚಾರ ಜವರಪ್ಪನಿಗೆ ತಿಳಿದು ಮನೆಯಲ್ಲಿ ಗಲಾಟೆ ಶುರುವಾಗಿತ್ತು. ಇದರಿಂದ ಸಿಟ್ಟಿಗೆದ್ದ ಅಮೃತಾ, ತನ್ನ ಪ್ರಿಯಕರನ ಜೊತೆ ಶಾಶ್ವತವಾಗಿ ಒಂದಾಗಲು ಪತಿಯನ್ನೇ ಮುಗಿಸಲು ನಿರ್ಧರಿಸಿದ್ದಳು.

​ಸಂಚಿನ ಭಾಗವಾಗಿಯೇ 12 ದಿನಗಳ ಹಿಂದೆ ಹಬ್ಬದ ನೆಪದಲ್ಲಿ ಅಮೃತಾ ಮಕ್ಕಳನ್ನು ಕರೆದುಕೊಂಡು ತವರು ಮನೆಗೆ ಹೋಗಿದ್ದಳು. ಏಪ್ರಿಲ್ 16 ರಂದು ಜವರಪ್ಪ ತನ್ನ ಪತ್ನಿ ಮತ್ತು ಮಕ್ಕಳನ್ನು ಕರೆತರಲು ಅತ್ತೆ ಮನೆಗೆ ಹೋಗುವುದಾಗಿ ಮನೆಯವರಿಗೆ ಹೇಳಿ ಹೊರಟಿದ್ದರು. ಆದರೆ ದಾರಿಯಲ್ಲೇ ಹೊಂಚು ಹಾಕಿದ್ದ ಪ್ರಿಯಕರ ಸಿದ್ದೇಶ, ಅಮೃತಾ ನೀಡಿದ ಮಾಹಿತಿಯಂತೆ ಜವರಪ್ಪನನ್ನು ಅಡ್ಡಗಟ್ಟಿ ಅತ್ಯಂತ ಭೀಕರವಾಗಿ ಕೊಲೆ ಮಾಡಿದ್ದಾನೆ. ಮಾರನೇ ದಿನ ಬೆಳಗ್ಗೆ ರಸ್ತೆ ಬದಿಯಲ್ಲಿ ಜವರಪ್ಪನ ರಕ್ತಸಿಕ್ತ ಶವ ಪತ್ತೆಯಾದಾಗ ಇಡೀ ಗ್ರಾಮವೇ ನಡುಗಿಹೋಗಿತ್ತು.

​ಶವ ಪತ್ತೆಯಾದ ಸ್ಥಳದಲ್ಲಿ ಅನುಮಾನಾಸ್ಪದ ಕುರುಹುಗಳು ಕಂಡುಬಂದ ಹಿನ್ನೆಲೆಯಲ್ಲಿ ಜವರಪ್ಪನ ಸಹೋದರ ರವಿ ಪೊಲೀಸರಿಗೆ ದೂರು ನೀಡಿದ್ದರು. ಪ್ರಕರಣದ ಆಳಕ್ಕಿಳಿದ ಎಸ್ಪಿ ಅವರು ಮೂರು ಪ್ರತ್ಯೇಕ ತನಿಖಾ ತಂಡಗಳನ್ನು ರಚಿಸಿದ್ದರು. ಪೊಲೀಸರು ಅಮೃತಾಳ ಮೊಬೈಲ್ ಕರೆಗಳ ಮೇಲೆ ಕಣ್ಣಿಟ್ಟಾಗ ಅಸಲಿ ಸತ್ಯ ಹೊರಬಿದ್ದಿದೆ. ಗಂಡ ಸತ್ತ ಸುದ್ದ ಕೇಳಿದರೂ ಕಣ್ಣೀರು ಹಾಕದ ಅಮೃತಾಳ ನಡವಳಿಕೆ ಕಂಡು ಪೊಲೀಸರು ವಿಚಾರಣೆ ನಡೆಸಿದಾಗ, ಪ್ರಿಯಕರನ ಜೊತೆ ಸೇರಿ ಹೆಣೆದಿದ್ದ ಕೊಲೆ ಸಂಚನ್ನು ಒಪ್ಪಿಕೊಂಡಿದ್ದಾಳೆ. ದೂರು ದಾಖಲಾದ 24 ಗಂಟೆಯೊಳಗೆ ಆರೋಪಿಗಳನ್ನು ಬಂಧಿಸಿದ ಸರಗೂರು ಪೊಲೀಸರ ಈ ಮಿಂಚಿನ ಕಾರ್ಯಾಚರಣೆಗೆ ಸಾರ್ವಜನಿಕರು ಮೆಚ್ಚುಗೆ ವ್ಯಕ್ತಪಡಿಸಿದ್ದಾರೆ. ಅತ್ತ ಹೆತ್ತ ತಂದೆ ಸಾವನ್ನಪ್ಪಿ, ಹಡೆದ ತಾಯಿ ಜೈಲು ಸೇರಿದ್ದರಿಂದ ಇಬ್ಬರು ಕಂದಮ್ಮಗಳು ಅನಾಥವಾಗಿವೆ.